Safle Ysgol Blaencaerau
Gweithiodd Prosiect Datblygu Ieuenctid Noddfa gyda thîm Reach ar astudiaeth ddichonoldeb i ddatblygu opsiynau ar gyfer defnyddio’r safle yn ysgol Blaencaerau ym Maesteg.
Mae Prosiect Cymunedol Noddfa yn cynnig cyfleoedd a gwasanaethau i’r gymuned gael mynediad at ddarpariaethau i blant, pobl ifanc ac oedolion drwy weithgareddau, prosiectau, clybiau, gweithdai, hyfforddiant, dysgu anffurfiol, dysgu achrededig a gweithgareddau dydd a nos yn y ganolfan gymunedol ac mewn mannau cymunedol.
Gwnaeth y grŵp gais i’r Gronfa Dichonoldeb Cymunedol ar gyfer cynnal astudiaeth ddichonoldeb i’w cynorthwyo wrth ystyried ymgymryd â threfniant trosglwyddo ased cymunedol (CAT) mewn perthynas â safle hen Ysgol Iau Blaencaerau. Llosgodd yr ysgol i lawr ac mae’r safle wedi ei adael ar hyn o bryd. Ar hyn o bryd, prin yw’r cyfleusterau chwarae a chwaraeon awyr agored yng Nghaerau sydd â mynediad agored ac sy’n rhoi cyfleoedd i blant a phobl ifanc deimlo’n ddiogel, bod yn egnïol, mwynhau cymdeithasu a chael hwyl gyda’i gilydd yn eu cymuned.
Hoffai’r gymuned weld safle Ysgol Blaencaerau yn cael ei ddefnyddio gan y gymuned, gyda’r posibilrwydd o Ardal Gemau Amlddefnydd, Ysgubor Chwaraeon Dan Do ac ardaloedd chwarae awyr agored fel tenis bwrdd a wal ddringo ac ati.
Mae tîm Reach wedi dyrannu cyllid i gomisiynu ymgynghorydd arbenigol i gynnal yr astudiaeth ddichonoldeb. Bydd yn ymgynghori â phobl ifanc, datblygu opsiynau ar gyfer defnydd a datblygiad y safle, ystyried a fyddai gosod adeilad mawr tebyg i sied yn bosibl, yn prisio a rhoi gwybodaeth ynglyn â chaffael y safle, canfod cronfeydd cyfalaf a allai fod ar gael i symud ymlaen i gam nesaf y prosiect a chyflwyno’r holl wybodaeth sydd ei hangen mewn adroddiad cynhwysfawr.
Prosiect Datblygu Ieuenctid Noddfa
Diweddariad ar yr ymgynghoriad dichonoldeb
Rydym yn falch o gyhoeddi bod ein hymgynghoriad diweddar ynghylch y cyfleuster chwaraeon pob tywydd arfaethedig ar hen safle Ysgol Blaencaerau wedi bod yn hynod lwyddiannus!
Diolch i bawb a ymunodd â ni ar Sul gwyntog Rhagfyr yn y Clwb BMX, a phawb a gymerodd yr amser i roi adborth gwerthfawr. Mae eich mewnbwn yn hanfodol i’n helpu i lunio dyfodol y mannau cymunedol hyn a bydd yn chwarae rhan allweddol wrth greu achos cymhellol dros pam mae angen y prosiect hwn.
Y Camau Nesaf
Ar hyn o bryd rydym yn dadansoddi’r adborth a dderbyniwyd o’r ymgynghoriad i sicrhau bod pob llais yn cael ei glywed.
Mae’r wybodaeth hon yn cael ei defnyddio i lywio astudiaeth ddichonoldeb fanwl, a fydd yn ein helpu i gryfhau ein hachos dros geisiadau am gyllid pan fyddant ar gael. Ein nod yw cwblhau’r astudiaeth ddichonoldeb yn ystod y misoedd nesaf.
Mae taflen grynodeb o’r ymgynghoriad ar gael isod.
Diolch unwaith eto am fod yn rhan o’r broses bwysig hon. Gyda’n gilydd, rydym yn gweithio i greu mannau i blant, pobl ifanc a theuluoedd ar draws Caerau fwynhau cyfleoedd hamdden gydol y flwyddyn.
Cyfleuster chwaraeon pob tywydd
Byddai cyfleuster chwaraeon pob tywydd ar hen safle Ysgol Blaencaerau yn cynnig man cysgodol gydol y flwyddyn ar gyfer chwaraeon a gweithgareddau. Rydym yn rhagweld:
- Ysgubor chwaraeon gysgodol a chaeedig
- MUGA awyr agored (ardal gemau aml-ddefnydd)
- Gemau awyr agored parhaol (e.e. Byrddau tenis bwrdd, cylchoedd pêl-fasged, wal ddringo ac ati)
Nod y prosiect hwn yw mynd i’r afael â’r diffyg mannau hamdden dan do yng Nghaerau, gan ddarparu mannau diogel, hygyrch i bobl ifanc ar gyfer chwarae a gweithgarwch corfforol yn ystod y misoedd oerach.
Cwestiynau Cyffredin
Pam fod angen y prosiectau hyn?
Rydym yn credu y gall Caerau elwa ar gyfleusterau hamdden gwell sy’n darparu mannau diogel, hygyrch ar gyfer gweithgarwch corfforol ac ymgysylltu cymdeithasol. Nod y prosiectau hyn yw mynd i’r afael â bylchau a nodwyd mewn adnoddau cymunedol a diwallu’r galw cynyddol am leoedd chwaraeon a gweithgareddau amlbwrpas.
A yw cyllid eisoes wedi’i sicrhau?
Er nad yw cyllid wedi’i sicrhau eto, rydym yn adeiladu achos cryf dros y prosiectau hyn fel y gallwn ni fynd ar drywydd cyfleoedd ariannu wrth iddynt godi.
Sut gallaf gael y wybodaeth ddiweddaraf am gynnydd y prosiect?
Byddwn ni’n darparu diweddariadau ar y dudalen hon, gan gynnwys cyhoeddiadau ar gerrig milltir prosiectau a datblygiadau ariannu.
Oriel y prosiect
